MINT propozon 1 mijë euro kapital minimal për ShPK-të

PRISHTINË — Ministria e Industrisë, Ndërmarrësisë dhe Tregtisë ka propozuar vendosjen e një kapitali minimal prej 1 mijë eurosh për themelimin e Shoqërive me Përgjegjësi të Kufizuar. Ky projektligj i ri synon të rrisë sigurinë juridike dhe të parandalojë keqpërdorimin e kësaj forme ligjore nga pronarët që ikin nga detyrimet ndaj kreditorëve.

Aktualisht, ligji në fuqi nuk përcakton asnjë shumë minimale për regjistrimin e një biznesi. Avokati Kasem Murturi shpjegon se kjo lejon aksionarët të mbrojnë pasurinë e tyre personale, pasi kompania ShPK përgjigjet për borxhet vetëm me asetet e regjistruara në emër të saj, duke lënë kreditorët pa asnjë dëmshpërblim real.

Kjo situatë ka krijuar vështirësi të mëdha për ekzekutimin e vendimeve gjyqësore në terren. Mehdi Reshani, kryetar i Odës së Përmbaruesve Privatë të Kosovës, tregon se procedurat shpesh pezullohen sepse shumë kompani ekzistojnë vetëm në letra dhe nuk zotërojnë asnjë llogari bankare, automjet apo makineri që mund të sekuestrohet.

Në anën tjetër, Agim Shahini nga Aleanca Kosovare e Bizneseve thekson se mungesa e këtij limiti ul besueshmërinë në treg. Sipas vlerësimeve të organizatës që ai udhëheq, mbi 25 për qind e transaksioneve ndërmjet bizneseve në Kosovë mbeten të hapura dhe të papaguara si pasojë e këtyre zbrazëtirave ligjore.

Edhe pse ligji i ri do të vështirësojë mashtrimet, ai nuk do të ndalojë plotësisht hapjen e bizneseve të reja nga pronarët me histori dështimi. MINT ka konfirmuar se ligji lejon krijimin e një kompanie të re pas mbylljes së të vjetrës, për sa kohë që veprimtaria e saj respekton legjislacionin në fuqi.

Burim: Klan Kosova
— Redaksia ZHURMA