Mickoski rindërton Qeverinë: VLEN merr tre resorë, ZNAM Bujqësinë
Si shpërndan Mickoski ministritë mes VMRO-DPMNE, VLEN dhe ZNAM?
SHKUP — Kryeministri Hristijan Mickoski mbrëmjen e 30 qershorit doli para mediave dhe prezantoi emrat e ministrave të rinj në rikonstruimin e Qeverisë. VMRO-DPMNE udhëheq Ministrinë për Politikë Sociale, Demografi dhe Rini, me Gjoko Velkovskin si ministër të ri.
Dy lëvizje të tjera brenda VMRO-DPMNE: Sasho Klekovski kalon nga Fondi i Sigurimit Shëndetësor dhe merr drejtimin e Ministrisë së Shëndetësisë, ndërsa Zlatko Perinski e zëvendëson atë në fond. Ivan Stoilkoviq lëviz nga Ministria për Marrëdhënie ndërmjet Bashkësive dhe merr drejtimin e Ministrisë për Vetëqeverisje Lokale.
Sa u përket partnerëve të koalicionit, Mickoski njoftoi se VLEN merr tre resorë: Ministrinë e Drejtësisë, Kulturën dhe Ministrinë për Marrëdhënie ndërmjet Bashkësive. Partneri tjetër i koalicionit, ZNAM-i, do të marrë Ministrinë e Bujqësisë.
Ministria për Qeverisje të Mirë shfuqizohet si resor i pavarur — kompetencat e saj kalojnë drejtpërdrejt nën kabinetin e kryeministrit. Mickoski e cilësoi rikonstruimin si "një fazë të re" me fokus në efikasitet dhe rezultate konkrete për qytetarët.
Burim: TV21
— Redaksia ZHURMA