Kush do të drejtojë resorët e VLEN-it dhe ZNAM-it?

SHKUP — Kryeministri Hristijan Mickoski bëri të ditur ndryshimet e reja në përbërjen e kabinetit qeveritar, duke konfirmuar emrat e disa ministrave të rinj, ndërsa nuk ka zbuluar se kush do të drejtojë resorët që do t'u takojnë partnerëve të koalicionit, VLEN dhe ZNAM. "Ajo që dua të theksoj është se posti i zëvendëskryeministrit për qeverisje të mirë nuk do të ekzistojë më si dikaster i veçantë në Qeveri, por ky portofol do të jetë drejtpërdrejt nën kompetencat e kryetarit të Qeverisë", tha Mickoski.

Sipas Mickoskit, VMRO-DPMNE do të vazhdojë të udhëheqë Ministrinë e Punës Sociale, Demografisë dhe të Rinjve, të cilën do ta drejtojë Gjoko Vellkovski, i cili deri më tani ishte zëvendësministër në këtë dikaster. Resorin e Shëndetësisë do ta marrë Sasho Klekovski, drejtori aktual i Fondit për Sigurim Shëndetësor. Në vend të tij, në krye të këtij Fondi do të emërohet ministri i deritanishëm i Vetëqeverisjes Lokale, Zllatko Perinski.

Ministër i ri i Vetëqeverisjes Lokale do të jetë Ivan Stoilkoviq. Erxhan Demir do të marrë postin e ministrit pa resor përgjegjës për Integrimin dhe Implementimin e Strategjisë për Përfshirjen e Romëve.

Megjithatë, Mickoski nuk zbuloi emrat e ministrave të ardhshëm nga radhët e VLEN dhe ZNAM. “Emrat nuk do t'i them, sepse ende nuk i kam marrë zyrtarisht”, tha ai, duke shtuar se zëvendësministrat e rinj do të zgjidhen në shtator. Nga VLEN pritet të emërohen ministra në tri dikastere: Ministrinë e Drejtësisë, Ministrinë e Kulturës dhe Turizmit, si dhe Ministrinë për Marrëdhënie Ndërmjet Bashkësive. ZNAM do të marrë drejtimin e Ministrisë së Bujqësisë, Pylltarisë dhe Ekonomisë së Ujërave.

Në opinion tashmë përfliten emra të mundshëm. Për postin e ministrit të Drejtësisë, më së shumti përmendet profesori universitar Jeton Shasivari. Në Ministrinë e Kulturës dhe Turizmit pritet gjithashtu të ketë ndryshime, ndërsa Bekim Sali pritet të vazhdojë të udhëheqë Ministrinë për Çështje Evropiane. Kreu i ZNAM-it, Maksim Dimitrievski, ka propozuar që Ministrinë e Bujqësisë ta drejtojë Borçe Serafimovski, sekretari aktual shtetëror në këtë ministri.

Burim: Almakos, https://almakos.com/mickoski-zbuloi-vetem-emrat-e-ministrave-te-vmro-se-per-vlen-in-dhe-znam-in-tregoi-vetem-resoret/
— Redaksia ZHURMA