Çfarë kërkon Mickoski nga BE-ja te Kosta?
Kryeministri maqedonas kërkon nga BE-ja vlerësim real të reformave, jo rregulla të lehtësuara.
BRUKSEL — Kryeministri i Maqedonisë së Veriut, Hristijan Mickoski, pas takimit me presidentin e Këshillit Evropian, António Kosta, deklaroi se vendi mbetet i përkushtuar në rrugën evropiane, por me një kusht: procesi i integrimit të bazohet në parime, merita dhe parashikueshmëri.
"Ne nuk kërkojmë privilegje, nuk kërkojmë rregulla të lehtësuara dhe nuk kërkojmë asgjë më shumë sesa atë që u takon edhe të tjerëve. Kërkojmë një proces kredibil dhe të parashikueshëm", tha Mickoski në konferencën e përbashkët. Ai shtoi se qytetarët, pas viteve të gjata pritjeje, kanë nevojë për "më shumë siguri" lidhur me perspektivën evropiane.
Mickoski iu drejtua edhe çështjes së identitetit: "Besoj se dinjiteti, identiteti dhe qëndrueshmëria ndaj parimeve nuk duhet të jenë pengesë për perspektivën evropiane. Ato janë pjesë përbërëse e saj." Qeveria e tij po punon për zbatimin e agjendës reformuese, forcimin e institucioneve dhe tërheqjen e investimeve, por theksoi se shteti do të vazhdojë si "partner konstruktiv" i BE-së.
Burim: Telegrafi
— Redaksia ZHURMA