Mësuesi Albano Ameti mbërrin në Gjykatën e Vlorës për masën e sigurisë

VLORË — Mësuesi i edukimit fizik i shkollës “Hajredin Beqari” në Selenicë, 35-vjeçari Albano Ameti, ka mbërritur në Gjykatën e Shkallës së Parë të Juridiksionit të Përgjithshëm Vlorë për t'u njohur me vendimin për caktimin e masës së sigurisë. Ky zhvillim vjen pas nisjes së hetimeve nga organet e drejtësisë për pretendimet e disa nxënëseve për ngacmim seksual.

Sipas deklarimeve të dhëna në polici, shtatë vajza të moshave 14 deri në 17 vjeçe pretendojnë se janë ngacmuar në ambientet e shkollës nga 35-vjeçari A.A., i cili u ndalua nga policia më 6 nëntor. Vajzat kanë dëshmuar se gjatë një ore mësimi në palestër në prani të të gjithë klasës, mësuesi u ka dhënë udhëzime si «Drejtoni gjoksin, shpatullat drejt, këmbët bashkuar», fjalë të cilat ato i kanë interpretuar si ngacmim seksual.

Në materialet e bëra publike nuk përmenden takime individuale, mesazhe apo komunikime private përmes telefonit midis mësuesit dhe nxënëseve. Pretendimet e bëra publike lidhen me fjalët dhe udhëzimet që ai dyshohet se ka përdorur gjatë zhvillimit të orës mësimore.

Një nxënës i shkollës deklaroi se e kishte dëgjuar mësuesin t'u drejtohej vajzave me fjalët «Hajde te lali zemra». Denoncimi ndaj tij u bë fillimisht pranë autoriteteve arsimore në Selenicë, të cilat më pas njoftuan policinë. Kolegët e 35-vjeçarit u shprehën të habitur nga lajmi, duke deklaruar se ai kishte pasur sjellje korrekte dhe se nuk kishin marrë ankesa të mëparshme për të.

Rrethanat e ngjarjes dhe dëshmitë e të miturave pritet të shqyrtohen nga trupi gjykues në Gjykatën e Vlorës për caktimin e masës ndaj mësuesit.