Pse mbylli mbrojtja e Thaçit çështjen në Hagë dhe çfarë rezervoi?
Avokatët e pesë të akuzuarve njoftuan se nuk paraqesin më prova, por kushtëzuan mbylljen me vendimin e ankesave të Prokurorisë.
HAGË — Mbrojtja e Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit ka njoftuar se nuk ka prova apo dëshmitarë të tjerë për të paraqitur, duke mbyllur kështu fazën e tyre në gjykimin për vepra penale kundër administrimit të drejtësisë.
Në njoftimin e saj, mbrojtja e Thaçit theksoi se ky hap nuk do të thotë që nuk do të përdorë mjete juridike për çështje që ende presin vendim nga gjyqtari. Mbrojtja e Smakajt, ndërkaq, rikujtoi se ka një ankesë të Prokurorisë për të cilën ende s'ka vendim, duke rezervuar të drejtën të mbajë deklaratë hyrëse dhe të paraqesë prova gojore e me shkrim nëse ajo aprovohet tërësisht ose pjesërisht.
Ngjashëm u shpreh edhe mbrojtja e Kilajt, që gjithashtu e ka mbyllur çështjen por do të paraqesë prova nëse pranohen provat e Prokurorisë që janë objekt i ankesës së saj.
Të pesë të akuzuarit u deklaruan të pafajshëm më 27 shkurt 2026. Në seancat që pasuan dëshmuan tre dëshmitarë të Prokurorisë, përfshirë ekspertin e kriminalistikës holandez Koen Herlaar dhe hetuesin e forenzikës digjitale Christopher Kelly, si dhe ekspertja e transkriptimit Helen Fraser për mbrojtjen e Thaçit.
Sipas aktakuzës së konfirmuar, Thaçi ka udhëhequr përpjekje për të penguar personat zyrtarë gjatë vizitave të tij në paraburgim më 2 korrik, 9 shtator dhe 6 tetor 2023, në koordinim me tre grupe: atë të Fazliut, Smakajt dhe Kilajt. Ndaj tij rëndojnë tri akuza për pengim të personit zyrtar, tri për shkelje të fshehtësisë së procedurës dhe katër për mosbindje ndaj gjykatës.
Thaçi ndodhet në paraburgimin e Hagës që nga nëntori 2020, ku po gjykohet edhe për krime lufte. Smakaj, Fazliu dhe Kilaj u arrestuan në Kosovë më 5 dhjetor 2024 dhe u transferuan në DhSK një ditë më pas.
Burim: Zëri
— Redaksia ZHURMA