Mbi 1 miliard euro pagoi Kosova për energjinë e importuar që nga viti 2021

Importi i energjisë elektrike i kushtoi Kosovës 1.03 miliard euro nga janari i vitit 2021 deri në shtator të vitit 2026, ndërsa vetëm gjatë vitit 2025 u paguan 259 milionë euro për këtë qëllim.

Të dhënat e publikuara nga Atlas Institute, të mbështetura te shifrat e Doganës së Kosovës dhe platforma Open Data Import, dëshmojnë se blerja e rrymës nga jashtë ka rënduar ndjeshëm buxhetin përgjatë këtyre viteve. Vitet e kaluara shënuan luhatje të mëdha në shpenzime dhe në vëllimin e energjisë së blerë, duke reflektuar varësinë e lartë të vendit nga tregu i jashtëm për të plotësuar nevojat e brendshme të konsumit.

Sipas statistikave të paraqitura nga Atlas Institute, në vitin 2021 Kosova pagoi 114 milionë euro për energjinë e importuar, me një çmim mesatar prej 93 euro për megavat-orë. Në vitin 2022, shpenzimet u rritën në 218 milionë euro, ndërsa çmimi mesatar arriti në 260 euro për megavat-orë. Gjatë vitit 2023, shuma e paguar zbriti në 116 milionë euro, kurse çmimi mesatar ra në 133 euro për megavat-orë. Më pas, në vitin 2024, pagesat për import arritën në 142 milionë euro me një çmim prej 138 euro për megavat-orë, ndërsa në vitin 2025 u shënua rekodi i pagesave prej 259 milionë eurosh, me çmim mesatar 136 euro për megavat-orë. Për periudhën nga janari deri në shtator të vitit 2026, pagesat e realizuara arritën në 182 milionë euro, ndërsa çmimi mesatar ishte 112 euro për megavat-orë.

Rritja e pagesave në vitin 2025 erdhi si pasojë e shtimit të sasisë së energjisë së importuar dhe rënies së prodhimit vendor. Sipas Atlas Institute, Kosova importoi 1.965 gigavat-orë energji gjatë vitit 2025, shifër kjo 42 për qind më e lartë sesa në vitin 2024. Ndërkohë, prodhimi vendor ishte 5.298 gigavat-orë, duke shënuar rënie prej 12.6 për qind krahasuar me vitin paraprak. Për vitin 2026, sasia e planifikuar e importit u parashikua të jetë 2.158 gigavat-orë.

Përveç vlerave të importit, raporti vjetor i Zyrës së Rregullatorit për Energji për vitin 2025 tregon se familjet përbëjnë 59.7 për qind të konsumit të përgjithshëm të energjisë elektrike. Sipas ZRRE-së, bizneset zënë 20.8 për qind, tregu i lirë përbën 7.9 për qind, industria 7.8 për qind, veriu 3 për qind dhe ndriçimi publik 0.8 për qind. Konsumi i familjeve ndryshon dukshëm gjatë vitit, duke arritur në 448 gigavat-orë në muajin janar dhe duke rënë në 193 gigavat-orë në qershor, gjë që paraqet një ndryshim sezonal prej 255 gigavat-orësh.

Të dhënat e Agjencisë së Statistikave të Kosovës për muajin gusht 2026 tregojnë se energjia elektrike bruto në dispozicion ishte 544.61 gigavat-orë, ose 8.46 për qind më shumë se në gushtin e vitit paraprak. Konsumi në këtë muaj arriti në 453.38 gigavat-orë, duke shënuar rritje prej 17.95 për qind. Importi i energjisë në gusht 2026 ishte 400.82 gigavat-orë, kurse eksporti arriti në 311.21 gigavat-orë, duke lënë një diferencë prej 89.61 gigavat-orësh në favor të importit. Prodhimi bruto nga hidrocentralet ishte 7.47 gigavat-orë, me një rritje prej 33.24 për qind krahasuar me gushtin e vitit 2025, ndërsa prodhimi i thëngjillit arriti në 477.562 mijë tonë.