Mickoski: Turizmi i huaj rritet 40%
Mickoski thotë se Maqedonia renditet e para në Evropë për rritjen e ardhjeve turistike, sipas raportit të Bankës Botërore.
SHKUP — Kryeministri i Maqedonisë së Veriut, Hristijan Mickoski, deklaroi se numri i turistëve të huaj në vend është rritur 40 për qind krahasuar me vitin e kaluar, si rezultat i masave dhe iniciativave të Qeverisë për zhvillimin e turizmit.
Sipas Mickoskit, rritja konfirmohet edhe nga raporti i fundit "Tourism Watch", i publikuar nga Banka Botërore në qershor të vitit 2026. Kryeministri tha se është regjistruar një rritje e madhe e ardhjeve edhe në aeroportet e vendit.
Sipas deklaratës së kryeministrit, Maqedonia e Veriut renditet e para në Evropë për rritjen e përqindjes së ardhjeve të turistëve dhe të bujtjeve të vizitorëve të huaj.
Zhvillimi i turizmit ka ndikim të drejtpërdrejtë në ekonominë e vendit, tha Mickoski, i cili shprehu pritjen që efektet pozitive të reflektohen edhe në Prodhimin e Brendshëm Bruto gjatë tremujorit të dytë të këtij viti.
Burim: Tetova Sot
— Redaksia ZHURMA