Maqedonci thotë se siguria kërkon diplomaci dhe bashkëpunim

Ministri i Mbrojtjes i Kosovës ka qenë i pranishëm si folës në edicionin e dymbëdhjetë të Shkollës Diplomatike për Diplomatë të Rinj. Ngjarja është organizuar nga Akademia Diplomatike e Republikës së Kosovës, ku u zhvilluan bashkëbisedime me diplomatë të rinj që vijnë nga vende të ndryshme të Azisë, Evropës, Afrikës dhe Amerikave.

Gjatë këtij takimi, Ejup Maqedonci ka shqyrtuar lidhjen mes fushës së mbrojtjes dhe diplomacisë, sfidat aktuale të sigurisë, rëndësinë e bashkëpunimit ndërkombëtar, si dhe ngritjen e kapaciteteve mbrojtëse të vendit. Sipas tij, siguria nuk ndërtohet vetëm përmes kapaciteteve ushtarake, por edhe përmes diplomacisë, institucioneve të qëndrueshme dhe partneriteteve ndërkombëtare.

Gjithashtu, ministri ka përmendur bashkëpunimin me vendet anëtare të NATO-s, zhvillimin e industrisë së mbrojtjes dhe avancimin e Programit Gjithëpërfshirës të Mbrojtjes. Ai ka veçuar rolin e diplomatëve të rinj në ndërtimin e marrëdhënieve ndërmjet shteteve, forcimin e mirëkuptimit dhe promovimin e paqes e të stabilitetit, duke shtuar se siguria është përgjegjësi e përbashkët dhe bëhet më e qëndrueshme kur diplomacia, institucionet e mbrojtjes dhe partneritetet ndërkombëtare veprojnë në mënyrë të koordinuar.