Dëshmia e Ledion Ballës për dhunën në protestë nga policia

Ledion Balla, i cili ndodhet i shtruar në Spitalin e Traumës pasi u dhunua nga katër punonjës të Policisë së Shtetit, ka rrëfyer përvojën e tij për emisionin investigativ. Ai ka treguar se ka qenë në një lokal dhe është përpjekur të largohej, por rruga ka qenë e bllokuar, duke shtuar se nuk ka qenë pjesë e protestës. «Isha aty në lokal dhe nisa një herë të iki. Pastaj s’kisha ku shkoja se ishte rruga e bllokuar. Ndëjta dhe vetëm kur ndjeva që u përplasa diku. Fuqishëm», ka deklaruar ai, duke shtuar se «Po nuk vritet njeriu kot».

Nëna e tij ka treguar për gjendjen e tij shëndetësore se atij i është futur hekur nga gjuri e deri poshtë dhe se është në fazën e rikuperimit, duke theksuar se nuk i janë dëmtuar lëkura apo enët e gjakut, por vetëm kocka. Gjatë vizitës në spital, kryeinfermieri ka kërkuar largimin e bashkëpunëtores së emisionit investigativ me pretendimin se ekziston një urdhër që Ledioni të mos flasë me askënd.

Për këtë ngjarje, Policia e Shtetit ka pezulluar katër punonjësit që e morën në krahë Ledionin, si dhe shefin e krimeve në Komisariatin e Policisë Nr.1. Ndërkohë, gjatë përpjekjeve për të marrë një prononcim, Drejtori i Përgjithshëm i Policisë së Shtetit, Skënder Hitaj, nuk ka dhënë shpjegime dhe ka thënë vetëm «Mirupafshim», ndërsa gazetarja dhe operatori janë larguar me forcë nga punonjës të tjerë në afërsi të kryeministrisë.