Lumi Krena në Gjakovë mbushet me mbeturina, qytetarët kërkojnë ndërhyrje

GJAKOVË — Ndotja në zonën përreth lumit Krena po shqetëson qytetarët e Gjakovës, të cilët thonë se mbeturinat po dëmtojnë biodiversitetin dhe bukurinë natyrore të kësaj hapësire. Shumë prej tyre e frekuentojnë zonën për shëtitje dhe rekreacion, por ndotja e vazhdueshme po i largon nga ky vend që dikur njihej për pastërtinë e saj.

"Këtu ka pasur dikur me vjet, ka pasur peshk, ka qenë i mbushur. Ka edhe shpendë që vijnë, është bukuri natyrore. Por me mbeturina, as nuk e sheh peshkun, as shpendët, asgjë", tha Shaban Berisha, banor i zonës. Ai shtoi se ndotja ka bërë që kjo hapësirë të humbasë tërësisht vlerat e saj ekologjike.

Artem Paçarizi, tjetër qytetar, njoftoi se edhe Federata e Peshkimit e ka ndaluar aktivitetin e peshkimit në këtë zonë për shkak të ndotjes. "Disa njerëz të papërgjegjshëm me mbeturina siç janë duke i hedhur, atëherë peshku nuk jeton këtu. Ju lutem që dikush të ndërmerr masa, përndryshe kjo bukuri do të shkatërrohet", tha ai.

Nga Kompania Rajonale e Mbeturinave "Çabrati" sqarojnë se segmenti i ndotur ndodhet në pjesën ku ende po zhvillohen punime për rehabilitimin e shtratit të lumit. "Pjesa që përfshin daljen prej Gjakovës, prej Sharrësgutit, është e papërfunduar. Do të pastrohet pasi të përfundojnë punimet", tha Behar Ferizi, drejtor i KRM "Çabrati".

Ferizi shtoi se pjesa e lumit që përshkon qytetin pastrohet në baza javore, sipas nevojës edhe dy ose tri herë në javë, por theksoi se "secili qytetar është përgjegjës për ruajtjen e ambientit". Komuna e Gjakovës konfirmoi po ashtu se zona vazhdon të jetë në proces rregullimi.

"Në momentin kur të përfundojë rregullimi, KRM 'Çabrati' do ta marrë në menaxhim dhe do të bëjë pastrimin e zonës", tha Artan Haraqia, Udhëheqës i sektorit për informim në Komunën e Gjakovës. Qytetarët kërkojnë ndërhyrje sa më të shpejtë për të ruajtur vlerat natyrore që e kanë karakterizuar këtë pjesë ndër vite.

Burim: Zëri
— Redaksia ZHURMA