Limaj: Reagimi i Trendafilovës, shenja e parë e efektit të ligjit të ri
Fatmir Limaj e ka cilësuar si hap pozitiv daljen publike të kryetares së Dhomave të Specializuara pas miratimit të ligjit të ri nga Kuvendi.
Redaksia ZHURMA · · 2 min lexim
Kryetari i NISMA-s, Fatmir Limaj, ka vlerësuar si zhvillim pozitiv reagimin e kryetares së Dhomave të Specializuara të Kosovës në Hagë, Ekaterina Trendafilova, lidhur me ndryshimet ligjore të miratuara nga Kuvendi i Kosovës. Gjatë një paraqitjeje televizive, ai tha se kjo paraqitje publike përbën shenjën e parë të efektit të ligjit të ri dhe erdhi si rezultat i veprimeve konkrete të ndërmarra nga institucionet e vendit.
Limaj theksoi se kryetarja e këtij institucioni nuk e ka komentuar drejtpërdrejt ligjin e ri, por është përqendruar te baza ligjore ekzistuese, duke u treguar e kujdesshme sepse nuk ka të drejtë të interpretojë ligjet e nxjerra nga Kuvendi. «Për mua është një hap pozitiv vetë detyrimi i saj me dalë me i dhënë disa sqarime, pavarësisht çka tha, tregon efektet e para të ligjit», u shpreh ai.
Në fjalën e tij, kreu i Nismës Socialdemokrate ka kritikuar gjithashtu mënyrën e funksionimit të Dhomave të Specializuara ndër vite. Sipas tij, institucionet e Hagës janë shoqëruar nga arroganca, mungesa e komunikimit dhe e transparencës, ndërsa shtoi se ato duhet t'u drejtohen qytetarëve në emër të të cilëve ushtrojnë veprimtarinë e tyre.
