Berisha thirrje qytetarëve: Mos i lini vetëm studentët

Kryetari i Partisë Demokratike, Sali Berisha, ka bërë thirrje qytetarëve shqiptarë të bashkohen me protestën e studentëve kundër qeverisë së Edi Ramës. Në një videomesazh, Berisha akuzoi kryeministrin për përdorim të dhunës policore ndaj protestuesve, duke thënë se mbi 2 mijë të rinj, gjimnazistë, studentë dhe të mitur janë dhunuar, ndaluar ose arrestuar gjatë protestave.

Berisha e cilësoi situatën si rikthim të "terrorit të kuq" dhe deklaroi se protesta e pedagogëve dhe profesorëve në mbështetje të studentëve ka rrëzuar strategjinë e qeverisë për t’i frikësuar protestuesit. Ai ftoi qytetarët që të kapërcejnë frikën dhe t’u bashkohen të rinjve në protestë, duke thënë se studentët po luftojnë jo vetëm për të ardhmen e tyre, por edhe për të ardhmen e Shqipërisë.

Berisha ftoi qytetarët të bashkohen me studentët nesër në orën 10:00, para universitetit, duke thënë: "Të gjithë me të rinjtë, të gjithë tek ata nesër në orën 10:00 para universitetit, gjer në fitore".