Leje pune për të huajt në Kosovë, të rinjtë kërkojnë largimin
Mbi 400 leje qëndrimi për punë u lëshuan në qershor, ndërsa mbi 40% e të rinjve 18-24 vjeç shprehen të gatshëm të largohen nga Kosova.
Gjatë qershorit, Ministria e Punëve të Brendshme lëshoi mbi 400 leje të përkohshme qëndrimi për punë, me aplikime nga qytetarë të vendeve fqinje dhe nga shtete si Turqia, Filipinet e të tjera aziatike. Ndërkohë, një hulumtim i Institutit Demokratik Kombëtar (NDI) tregon se mbi 40 për qind e të rinjve të moshës 18 deri në 24 vjeç janë të gatshëm të largohen nga Kosova.
Sociologu Besim Gollopeni, në podkastin “5 pyetje” të Radios Evropa e Lirë, e cilëson këtë si paradoks të tregut të punës: vendi po bëhet më tërheqës për punëtorët e huaj, por nuk u ofron të rinjve vendas siguri dhe perspektivë. Ai thotë se punëtorët nga Azia vijnë për paga më të mira se në vendet e tyre, por shumë prej tyre e shohin Kosovën si vend tranzit për emigrim të mëtejshëm.
Gollopeni shprehet se nga një perspektivë afatgjatë, prania e të huajve është lajm i mirë, por realiteti i përditshëm tregon mungesë perspektive për qytetarët e Kosovës.