Lama: Kriza dyvjeçare dëmtoi imazhin, duhen rikuperuar raportet me SHBA-në

Ish-ambasadorja e Kosovës në Itali, Alma Lama, deklaroi se kriza politike dyvjeçare ka dëmtuar rëndë imazhin e Kosovës në arenën ndërkombëtare dhe kërkoi një angazhim të ri diplomatik, veçanërisht për rikuperimin e raporteve me Shtetet e Bashkuara të Amerikës, pas konsolidimit të institucioneve.

Sipas ish-diplomates Lama, zhvillimet politike të dy viteve të fundit kanë pasur ndikim negativ si në funksionimin e brendshëm të institucioneve, ashtu edhe në fushën e diplomacisë. Ajo vlerësoi se vetë prania e krizës së vazhdueshme ka goditur imazhin e vendit jashtë kufijve, ndërkohë që rrethanat gjeopolitike ndërkombëtare kanë ndryshuar rrënjësisht.

Në analizën e saj për situatën ndërkombëtare, Lama tha se lufta në Ukrainë dhe tensionet e shkaktuara nga Rusia e kanë vendosur të gjithë Evropën në krizë politike, ekonomike dhe të sigurisë. Këto zhvillime kanë bërë që vëmendja e shteteve evropiane ndaj kërkesave të Kosovës të jetë më e ulët, gjë që kërkon përshtatje të politikave nga ana e institucioneve kosovare. Ajo po ashtu njoftoi se mungesa e vëmendjes nga Bashkimi Evropian dhe sidomos nga SHBA-ja lidhet kryesisht me mënyrën se si kanë vepruar vetë institucionet e vendit.

Sa i përket anëtarësimit në organizata ndërkombëtare, si Këshilli i Evropës, UNESCO, Bashkimi Evropian dhe NATO, ish-ambasadorja nënvizoi se Kosova duhet të plotësojë kritere të caktuara dhe të mos mbështetet vetëm në deklarata pa siguruar përkrahjen e aleatëve. Për çështjen e Këshillit të Evropës, ajo përmendi dërgimin e projekt-statutit në Gjykatën Kushtetuese si një kusht të vendosur nga disa vende, për të cilin duhet lobuar dhe treguar vullnet politik për plotësimin e tij.

Sa i përket hapave të mëtejshëm në diplomaci, Lama nënvizoi se nevojitet një vrull i ri i angazhimit shtetëror. Ajo potencoi se presidentja duhet të luajë rolin e saj për rikuperimin e raporteve, ndërsa theksoi se përgjegjësia kryesore i takon kryeministrit, i cili i drejton politikat dhe qëndrimet që mund t'i forcojnë ose dëmtojnë marrëdhëniet me partnerët ndërkombëtarë.

Në këtë kuadër, Alma Lama tha: «Së pari, mendoj që dy vite të krizës politike kanë ndikuar jashtëzakonisht negativisht në shumë plane, si në planin e funksionimit të brendshëm të institucioneve, por edhe të diplomacisë. Përkundrazi, pavarësisht se s’ka pasur veprime, vetë fakti që ka pasur një krizë të vazhdueshme politike në Kosovë e kanë dëmtuar shumë rëndë imazhin e Kosovës në arenën ndërkombëtare».

Lama po ashtu shtoi për pozicionimin gjeopolitik: «Problemi është që e tërë Evropa tani është në krizë të rëndë politike, ekonomike, krizë të sigurisë për shkak të luftës në Ukrainë dhe provokimeve të vazhdueshme që i bën Rusia, saqë kam frikë se nuk ka shumë vesh për t’i dëgjuar kërkesat e Kosovës».

Lidhur me drejtimin e politikës së jashtme, ajo po ashtu u shpreh: «Tani që janë konsoliduar institucionet, mendoj që diplomacia duhet të angazhohet, presidentja do të duhet ta luajë rolin e saj ndoshta për të rikuperuar disa raporte, por mos të harrojmë se fuqinë në Kosovë e ka kryeministri. Është ai pra që i drejton politikat, dhe nëpërmjet politikave që ai bën ose qëndrimeve që ai mban, mund t’i dëmtojë ose t’i forcojë raportet».