Çfarë deklaroi Labinot Bislimi pas takimit me Taulant Ballën?
Përfaqësuesi i AAK-së mbështeti qeverinë e Edi Ramës, por paralajmëroi ata që synojnë destabilizimin e shtetit shqiptar.
TIRANË — Kryetari i grupit parlamentar të Partisë Socialiste, Taulant Balla, zhvilloi më 27 qershor një takim në Tiranë me përfaqësuesin e Aleancës për Ardhmërinë e Kosovës (AAK), Labinot Bislimi. Balla e cilësoi Bislimin si një patriot të vërtetë shqiptar gjatë këtij takimi.
Pas takimit, Bislimi shprehu në rrjetet sociale ku deklaroi mbështetjen e tij të plotë për qeverinë shqiptare të udhëhequr nga Edi Rama. Ai u shpreh se përshëndet çdo protestë qytetare që niset nga nevojat e qytetarëve, mjedisi, pasuria dhe trashëgimia gjuhësore e kulturore shqiptare.
Sipas Bislimit, protestat e tilla shprehin më së miri një qytetari të emancipuar dhe aktive, gjë që ai e konsideron thelbin e një demokracie të shëndoshë. Ai theksoi se kërkimi për më shumë Shqipëri është një proces legjitim i qytetarëve të ndershëm.
Megjithatë, përfaqësuesi i AAK-së u shpreh se do të jetë në një luftë të pakompromis me ata që synojnë destabilizimin e shtetit dhe kryeqendrës së tij. Bislimi dënoi tentativat për marrjen e pushtetit përmes kryengritjes, duke shmangur zgjedhjet demokratike dhe vullnetin e lirë të qytetarëve.
Ai u deklarua kundër shantazhimit të qeverisë legale dhe inkurajoi debatin e hapur, duke kritikuar ata që organizohen dhe financohen nga struktura të huaja për interesa të huaja. Bislimi mbylli deklaratën duke theksuar rrugën e përbashkët drejt një Shqipëri evropiane.
Burim: ATSH
— Redaksia ZHURMA