Kuvendi miraton masat e emergjencës për energjinë dhe projektligjet
Kuvendi i Kosovës ka miratuar vendimin e Qeverisë për masat e emergjencës në furnizimin me energji, si dhe projektligje të tjera të votuara pas mesnatës.
Redaksia ZHURMA · · 2 min lexim
Kuvendi i Kosovës ka miratuar vendimin e Qeverisë për vendosjen e masave të emergjencës në furnizimin me energji elektrike. Vendimi mori 61 vota për, pa asnjë votë kundër dhe asnjë abstenim, ndërsa masat do të mbeten në fuqi për një periudhë prej 60 ditësh. Kryetarja e Kuvendit, Albulena Haxhiu, konstatoi miratimin e këtij vendimi pas përfundimit të votimit. Sipas masave të reja emergjente, ndërmarrja “Ibër-Lepenci” obligohet të prodhojë energji nga Ujmani për konsumatorët që gëzojnë të drejtën e shërbimit universal, kurse parashikohet edhe themelimi i një Komiteti Teknik Emergjent.
Gjatë seancës së pasmesnatës, e cila u shoqërua me debate dhe reagime, deputeti i Partisë Demokratike të Kosovës, Eman Rrahmani, kërkoi dorëheqjen e ministres së Ekonomisë, Artane Rizvanolli, duke e bërë atë përgjegjëse për situatën e krijuar. Ndërkohë, deputetja e Lidhjes Demokratike të Kosovës, Janina Ymeri, drejtoi kritika të ashpra gjatë shqyrtimit të Projektligjit për Rregullatorin e Energjisë, duke pretenduar se ligji është punuar sa për sy e faqe dhe se rregullatori mbikëqyret nga tregtarët e energjisë.
Përveç masave të emergjencës, Kuvendi miratoi në parim me 61 vota për edhe Projektligjin për Rregullatorin e Energjisë, si dhe Projektligjin për efiçencë të energjisë në lexim të parë. Të dyja këto pika u futën në rendin e ditës përmes mocioneve, ndërsa votimet përfunduan gjatë orëve të hershme të mëngjesit.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar