Kuvendi i Maqedonisë shkon në pushime pa miratuar pesë ligje kyçe
Mickoski thotë se është i fokusuar te projektet, ndërsa Kuvendi la pa zgjidhur edhe dy vende gjyqtarësh kushtetues.
SHKUP — Kuvendi i Maqedonisë shkoi në pushime verore pa i miratuar disa ligje kyçe: Kodin Zgjedhor, Ligjin për Përfaqësim të Drejtë, Ligjin për Arsimin e Lartë, Ligjin për Vetëqeverisjen Lokale dhe Ligjin Anti-duhan. Shumica e tyre mbetën të bllokuara nga opozita, e cila nuk u pajtua me zgjidhjet e propozuara pa konsensus të gjerë, ndërsa shumica parlamentare nuk ka as numrat e nevojshëm për shumicën e Badinterit.
Kryeministri Hristijan Mickoski tha se ai vetë ka qenë i fokusuar në projekte që rrisin cilësinë e jetës së qytetarëve, ndërsa «kalkulimet politike, moçalin politik të disa partive politike opozitare ua lë atyre». Sipas tij, ligjet e propozuara nga Qeveria i kanë kaluar të gjitha filtrat dhe procedurat dhe tani janë çështje e deputetëve në Kuvend, jo e Qeverisë.
Krahas ligjeve, Kuvendi shkoi në pushim edhe pa zgjedhur dy gjyqtarë kushtetues. Emri i Meri Dika Gjeorgjievskës u vendos disa herë në rend dite, por nuk u votua pasi mungonte përfaqësuesi i Këshillit Gjyqësor. Në vjeshtë duhet të propozohet një emër i ri edhe në vend të gjyqtarit Goce Naumovski, i cili kishte dhënë dorëheqje paraprakisht.
Burim: Alsat-M
— Redaksia ZHURMA