Si trajtohen pacientët në burgun e Shënkollit?

— Avokati i Popullit, Endrit Shabani, konstatoi kushte degraduese dhe shkelje direkte të të drejtave të njeriut gjatë një inspektimi të paparalajmëruar në Institucionin e Ekzekutimit të Vullnetit (IEVP) në Shënkoll. Sipas gjetjeve, qendra funksionon si një burg me vetëm dy psikiatër, ndërkohë që për shkak të masave mjekësore të marra ndaj personave që nuk kanë zotësi veprimi, ajo duhet të ishte një spital me siguri të lartë.

Gjatë kontrollit të kryer këtë të hënë dhe të martën, ekipi i inspektimit zbuloi një mbipopullim të rëndë të ambienteve të akomodimit. Shabani deklaroi se në disa qeli janë përqendruar deri në 12 veta, gjë që cenon dinjitetin njerëzor dhe standardet minimale të Komitetit Evropian për Parandalimin e Torturës.

Situata mjekësore përshkruhet si kritike për shkak të mungesës së theksuar të personelit të specializuar. Avokati i Popullit theksoi se është e papranueshme që qeniet njerëzore, veçanërisht ato që vuajnë nga probleme të shëndetit mendor, të trajtohen në këto kushte, duke kërkuar ndërhyrjen urgjente të Ministrisë së Shëndetësisë dhe Drejtësisë.

Inspektori vëreu se një pjesë e godinës është tashmë e pabanueshme dhe duhet të shembet. Gjatë procesit po verifikohen regjistrat e ankesave dhe po zhvillohen biseda private me të burgosurit, pa praninë e stafit të institucionit, për të siguruar transparencë në raportimin e shkeljeve.

Një pikë problematike e ngritur nga Shabani është fakti që këto persona nuk përfitojnë nga amnistitë penale, ndryshe nga të dënuarit e vetëdijshëm. Kjo krijon një paradoks ku pacientët, që nuk kuptojnë pasojat e veprimeve të tyre, trajtohen në kushte edhe më të rënda dhe qëndrojnë më gjatë nëpër qeli.

Ky inspektim do të shërbejë për të krahasuar situatën aktuale me atë të vitit të kaluar, ku ishte konstatuar realiteti i njëjtë. Shabani kujtoi mbylljen e një institucioni të ngjashëm në Zahari pas insistimit të tij, duke e cilësuar si të pafalshme faktin që shteti shqiptar është kthyer sërish në të njëjtat gabime.

Pas përfundimit të procesit, raporti i plotë me gjetjet dhe rekomandimet konkrete do t'i përcellohet Ministrisë së Drejtësisë dhe Drejtorisë së Përgjithshme të Burgjeve. Sipas Avokatit të Popullit, kjo ndërhyrje duhet të jetë prioriteti numër një për të ndaluar trajtimin denigrues në këtë qendër.

Burim: Euronews Albania
— Redaksia ZHURMA