Çfarë i kërkoi Kurti mërgimtarëve në Zvicër?
Kandidati i VV-së për kryeministër i kërkon mërgimtarëve në Zvicër të zgjedhin mes patriotizmit dhe korrupsionit.
ZVICËR — Kandidati për kryeministër nga Lëvizja Vetëvendosje, Albin Kurti, ka deklaruar se kontributi për çlirimin dhe pavarësimin e Kosovës nuk mund të përdoret si arsyetim për korrupsion dhe pasurim personal.
Në një tubim me mërgimtarë të shtunën, Kurti tha se drejtësia duhet të vlejë për të gjithë, pavarësisht rolit që dikush ka pasur gjatë luftës apo proceseve shtetformuese. "Kemi respekt për të gjithë ata që sakrifikuan e kontribuan për çlirimin e Kosovës, bashkimin e për pavarësinë e Republikës. Mirëpo, çfarëdo kontributi, çfarëdo sakrifice që ka bo cilido prej nesh nuk është leje për korrupsion e për pasurim", deklaroi ai.
Kurti e shkoi më tej me një formulim të ashpër: "Nuk ka edhe patriot edhe hajn. Ose patriot, ose hajn. Nuk ka edhe çlirimtar, edhe zullumqar. Ose çlirimtar, ose zullumqar." Ai u shpreh se VV-ja është "bashkë me juve si patriot e çlirimtar kundër hajnave e zullumqarëve."
Pa përmendur emra, Kurti kritikoi ish-udhëheqës politikë të pasluftës, duke thënë se "pushimi" nga angazhimi patriotik është shndërruar në korrupsion. "Patriotizmi është punë pa pushim. Në këto vitet e pas luftës kemi shembuj të dikujt që ka qenë patriot, po masnej tha po pushoj pak. E ju e dini çka i bjen pushimi — pushimi i bjen korrupsion", përfundoi ai.
Burim: Koha.net
— Redaksia ZHURMA