Si po krijon Serbia 'dualizma shtetërorë' në Kosovë përmes presionit të votuesve?

PRISHTINË — Problematika e ndërhyrjeve dhe trysnisë ndaj votuesve serbë në Kosovë është rikthyer në fokus pas arrestimit të shtatë personave të dyshuar për cenim të votës së lirë. Institucionet e drejtësisë po i hetojnë pretendimet për presion dhe shantazh ndaj qytetarëve serbë, me qëllim orientimin e tyre politik në favor të Listës Serbe.

Kryeministri në detyrë, Albin Kurti, ka deklaruar se qytetarët e komunitetit serb po përballen me kërcënime dhe kushtëzime të vazhdueshme, duke e cilësuar këtë fenomen si një ndër format më të rënda të ndërhyrjes politike në vitet e fundit. Sipas tij, ndikimi i Beogradit ndaj votuesve serbë në Kosovë po manifestohet përmes strukturave që synojnë kontroll politik dhe institucional. "Serbia vazhdimisht mundohet të ketë elemente të saj, përmes së cilave dëshiron të krijojë dualizma shtetërorë brenda territorit tonë", ka thënë Kurti, duke shtuar se "s'ka të bëjë me etninë e asnjë qytetari që ndalohet, kjo ka të bëjë me dyshimet mbi veprimet e tyre".

Analisti politik Sadik Zeqiri vlerëson se presioni ndaj votuesve serbë që nuk mbështesin Listën Serbe buron drejtpërdrejt nga strukturat politike të Beogradit. "Kosova ka nevojë për një votë ndryshe në veriun e Kosovës, sepse atje çdo votë që bëhet... është e blerë vota e tyre", ka thënë Zeqiri.

Instituti i Kosovës për Demokraci, përmes Vullnet Bugaqkut, thekson se çdo formë e trysnisë ndaj votuesve përbën vepër penale sipas Kodit Penal të Kosovës, me dënim nga 1 deri në 5 vjet burgim efektiv. RTK-ja ka konfirmuar nga Prokuroria Themelore në Prishtinë se të shtatë të arrestuarit mbajnë pozita udhëheqëse në institucione arsimore dhe qendra mjekësore; njëri prej tyre është asamblist në Komunën e Graçanicës. Prokuroria ka bërë të ditur se brenda afatit ligjor do të shqyrtohet mundësia për caktimin e masave të sigurisë.

Burim: Zëri
— Redaksia ZHURMA