Pse iu shmang Kurti komenteve për protestat e studentëve në Maqedoni?
Kryeministri në detyrë i Kosovës iu shmang komenteve për kërkesat e studentëve shqiptarë për gjuhën shqipe në institucione.
PRISHTINË — Kryeministri në detyrë i Kosovës, Albin Kurti, në një paraqitje në Kanal 10, u pyet për protestat e studentëve shqiptarë në Maqedoninë e Veriut, të cilët kërkojnë zbatimin e gjuhës shqipe në institucionet shtetërore.
Kurti tha se nuk mund të flasë për çështjen, duke argumentuar se partia e tij, Vetëvendosje, ka deputet në Kuvendin e Maqedonisë së Veriut përmes koalicionit VLEN, i cili është pjesë e shumicës qeverisëse. "Nuk më është dukur që në këtë fazë kur e ke deputetin e Vetëvendosjes në VLEN, të flas unë", deklaroi ai.
Ai specifikoi se bëhet fjalë për deputetin Bekim Qoku, duke shtuar se Qoku "kur vjen në Kosovë është Vetëvendosje, ndërsa atje është VLEN". Kurti u shpreh se po e bën më shumë "komentuesin" se "përfaqësuesin".
Kurti është ndër udhëheqësit shqiptarë që nuk kanë dalë me mbështetje publike për studentët, të cilët kërkuan që provimi i Jurisprudencës të jepet edhe në gjuhën shqipe.
Burim: Telegrafi
— Redaksia ZHURMA