Kurti kërkon përshpejtimin e rrugës së Kosovës drejt BE-së

Gjatë një vizite zyrtare në Irlandë, kryeministri i Republikës së Kosovës, Albin Kurti, është pritur nga përfaqësuesit e Komitetit për Çështje të Bashkimit Evropian në Parlamentin e këtij shteti. Në takimin e zhvilluar atje morën pjesë kryesuesi i Komitetit, Barry Ward, anëtari Rúairí Ó Murchú, sekretari Ivan Farmer, si dhe drejtori për Zgjerim dhe Njësinë për Evropën Juglindore.

Kreu i Qeverisë ka kërkuar që Këshilli i Bashkimit Evropian t'i drejtohet me një kërkesë Komisionit Evropian për mendim lidhur me aplikimin e Kosovës për anëtarësim, i cili u dorëzua në dhjetor të vitit 2022. Sipas tij, përfitimet e qytetarëve dhe forcimi i shtetit vijnë përmes përmbushjes së reformave: «Për ne procesi nuk është më pak i rëndësishëm se arritja në cak, sepse me përmbushjen e reformave përveçqë lëvizim përpara në rrugën evropiane, përfitojnë qytetarët dhe forcohemi si shtet», ka theksuar ai.

Gjithashtu, kryeministri ka shprehur mirënjohje për mbështetjen e vazhdueshme që Irlanda i ka dhënë Kosovës, duke përmendur kontributin e këtij vendi në strehimin e refugjatëve dhe angazhimin e tij në kuadër të misionit të KFOR-it.

Siç raportoi Zhurma më 4 nëntor 2026, Komisioni Evropian ka vlerësuar proceset integruese dhe sfidat e vendit në raportet e tij.