Si mbrojti Kurti vendimin për 2 milionë euro për linjat ajrore?

PRISHTINË — Kryeministri në detyrë Albin Kurti ka reaguar pas vendimit të Qeverisë për ndarjen e 2 milionë eurove për subvencionimin e linjave ajrore që lidhin Aeroportin “Adem Jashari” me destinacionet e mërgatës kosovare.

Kurti tha se masa synon të parandalojë anulimin e fluturimeve gjatë sezonit veror për shkak të rritjes së kostos së karburantit. Ai theksoi se korriku dhe gushti janë periudha kur diaspora kthehet masivisht në vendlindje, dhe se anulimet do të dëmtonin qytetarët dhe ekonominë.

Ai hodhi poshtë akuzat e opozitës se vendimi lidhet me zgjedhjet, duke shkruar: “Nuk bëhet fjalë për blerje biletash apo ardhje të organizuar për zgjedhje, siç u pretendua nga disa qarqe të bllokut opozitar.” Kurti e krahasoi skemën me ato që aplikojnë “shumica e shteteve të rajonit” për të mbështetur lidhjet me diasporën. Për zbatimin e masës ai angazhoi ministrat Hekuran Murati dhe Dimal Basha.

Burim: Zëri
— Redaksia ZHURMA