Si e shpjegon Kupchan pezullimin e anëtarësimit të Kosovës në NATO dhe BE?

PRISHTINË — Charles Kupchan, profesor amerikan dhe ish-asistent special i presidentit Barack Obama, thotë se Kosova ka gjasa të anëtarësohet në NATO përpara se të hyjë në Bashkimin Europian — por thekson se për momentin asnjë nga dy rrugët nuk është e hapur.

Profesori i Georgetown University u shpreh për Gazetën Express lidhur me Rezolutën e paraqitur Dhomës së Përfaqësuesve më 30 prill 2026, të iniciuar nga Kongresmenët Keith Self, Ritchie Torres dhe Mike Lawler. Rezoluta shpreh mbështetje të fortë për integrimin e Kosovës në NATO dhe kërkon gjithashtu që SHBA të inkurajojë katër anëtarët mosnjohës të aleancës — Greqinë, Rumaninë, Spanjën dhe Sllovakinë — të njohin pavarësinë e Kosovës.

Profesori amerikan, megjithatë, thotë se Rezoluta ka pak peshë praktike tani: "Rezoluta është aspirative dhe, për momentin, ka pak efekt. Administrata e Trump-it e ka vënë në pauzë zgjerimin e NATO-s. Kosova po përjeton një periudhë të zgjatur të paqëndrueshmërisë politike; edhe një herë është duke shkuar drejt zgjedhjeve. Dialogu me Serbinë është efektivisht i pezulluar. Në këto kushte, çdo përparim drejt anëtarësimit në NATO apo BE është jashtë tryezës."

Lidhur me katër anëtarët mosnjohës të NATO-s, ka shtuar tutje Kupchan: "Pres që këta katër anëtarë të NATO-s të ecin përpara drejt njohjes vetëm pasi Prishtina dhe Beogradi të jenë në ose afër normalizimit."

Megjithatë, profesori lë hapësirë optimizmi afatgjatë: "Mendoj se ka gjasa që Kosova një ditë të anëtarësohet si në BE ashtu edhe në NATO. Anëtarësimi në NATO mund të vijë i pari, pasi anëtarësimi në BE kërkon reforma politike dhe ekonomike mjaft të rënda." Kjo e vendos rrugën e NATO-s si më të realizueshme — por vetëm pasi të largohen bllokimet aktuale.

Burim: Ekonomia Online
— Redaksia ZHURMA