Kumanova nis spërkatjen ajrore më 5 gusht — mbulohen 1,270 hektarë
Aksioni i dytë do të nisë në orën 05:00 dhe do të mbulojë 1,270 hektarë, duke përfshirë rrjedhat e lumenjve Kumanovë, Likovë dhe Kojnare.
KUMANOVË — Komuna e Kumanovës ka njoftuar se faza e dytë e spërkatjes ajrore kundër mushkonjave të rritura do të zhvillohet të mërkurën, më 5 gusht, duke nisur nga ora 05:00 e mëngjesit. Ky trajtim do të mbulojë një sipërfaqe prej gjithsej 1,270 hektarësh.
Në këtë ndërhyrje do të përfshihen rrjedhat e lumenjve Kumanovë, Likovë dhe Kojnare, si dhe bashkësitë lokale Babin Dol, Goce Delçev dhe Tode Mendol. Gjithashtu, spërkatja do të mbulojë pjesën qendrore të qytetit dhe hapësirën rreth impiantit të trajtimit të NP “Ujësjellësi” në fshatin Dobrashan.
Sipas autoriteteve komunale, gjatë ndërhyrjes do të aplikohet preparati Aqua Perm-X 30-30, ndërsa bletarëve u kërkohet të marrin masat për mbrojtjen e bletëve. Në rast se moti pengon spërkatjen, ajo do të shtyhet për ditën pasuese kur kushtet atmosferike të jenë të përshtatshme.
Burim: Portalb
— Redaksia ZHURMA