Schuebel: Bllokada institucionale ngadalësoi reformat

Ambasadori i Bashkimit Evropian në Kosovë, Dirk Schuebel, deklaroi se bllokada politike gjatë vitit të kaluar ndikoi në ngadalësimin e reformave evropiane, duke theksuar se zhvillimet e reja krijojnë mundësi për përshpejtimin e tyre. Në konferencën për media pas dorëzimit të Raportit për Kosovën për vitin 2026, Schuebel theksoi se periudha e vlerësuar u karakterizua nga tri palë zgjedhje brenda 16 muajsh, një Kuvend i nekonstituar për pjesën më të madhe dhe një Qeveri që kryesisht funksiononte në detyrë.

Sipas ambasadorit të Bashkimit Evropian, kjo situatë prodhoi një ritëm më të ngadaltë të reformave, i cili u pasqyrua edhe në raportin e Komisionit Evropian. Ai tha se Kosova tashmë ka një Kuvend të konstituuar, një Qeveri me mandat të plotë dhe një presidente të sapozgjedhur, ndërsa Bashkimi Evropian pret qëndrueshmëri të ripërtërirë institucionale për të çuar përpara reformat evropiane.

Gjatë prezantimit të gjetjeve, Schuebel veçoi se Kosova ka arritur të shënojë përparim përmes zhvillimit të zgjedhjeve parlamentare dhe lokale në mënyrë të rregullt, paqësore dhe gjithëpërfshirëse. Sipas tij, është shënuar gjithashtu avancim i nivelit të përgatitjes në luftën kundër krimit të organizuar dhe përmirësim i ritmit në reformën e administratës publike, lirinë dhe sigurinë, statistikat, lëvizjen e lirë të kapitalit, shërbimet financiare dhe politikën rajonale.

Ambasadori veçoi miratimin e Ligjit për Parandalimin e Pastrimit të Parave dhe Luftimin e Financimit të Terrorizmit si një hap të shumëpritur për luftën kundër krimit të organizuar, lëvizjen e lirë të kapitalit dhe përgatitjet për t'iu bashkuar Zonës së Vetme të Pagesave në Euro, si dhe ratifikimin e tri protokolleve shtesë të CEFTA-s për integrimin ekonomik rajonal.

Megjithatë, Schuebel theksoi se një sërë reformash ende kanë mbetur pezull, duke bërë me dije se në gjyqësor dhe të drejta themelore nuk është parë përparim domethënës. Ai shtoi se reforma në drejtësi duhet të përfundojë në përputhje me rekomandimet e Komisionit të Venecias, liria e shprehjes dhe korniza ligjore përfshirë Ligjin për Komisionin e Pavarur të Mediave dhe Ligjin për Radio Televizionin e Kosovës duhet të avancohen, kurse lufta e besueshme kundër korrupsionit dhe miratimi i një strategjie kundër korrupsionit mbeten çështje urgjente.

«Kjo periudhë raportuese u karakterizua nga një bllokadë institucionale në Kosovë. Tri palë zgjedhje brenda 16 muajsh, një Kuvend që për pjesën më të madhe të kësaj periudhe nuk ishte konstituuar dhe një Qeveri që kryesisht funksiononte në detyrë», u shpreh Schuebel, duke u bërë thirrje institucioneve të mos e humbasin këtë rast për të kompensuar vonesat.