Kujtohet regjisori dhe aktori i madh amerikan Orson Welles

Në përvjetorin e vdekjes kujtohet Orson Welles, regjisori dhe aktori i madh amerikan që u nda nga jeta më 10 tetor të vitit 1985 në moshën 70-vjeçare. I lindur më 6 maj 1915 në Kenosha të Wisconsin-it, ai la gjurmë të rëndësishme në film, radio dhe teatër si aktor, regjisor, skenarist dhe producent.

Welles fitoi famë ndërkombëtare në vitin 1938 përmes adaptimit radiofonik të romanit “Lufta e botëve” të H. G. Wells. Filmi i tij i parë artistik, “Citizen Kane”, i realizuar më 1941, vlerësohet si një nga kryeveprat e historisë së kinemasë për stilin inovativ të regjisurës dhe mënyrën e veçantë të rrëfimit filmik. Gjatë karrierës, ai u nderua me çmime të rëndësishme, përfshirë çmimin e nderit të Akademisë Amerikane të Filmit në vitin 1970, duke mbetur një nga artistët më me ndikim në kinematografinë botërore.