Pse ftesa e Serbisë për votim rrëzon narrativën e "përndjekjes" së serbëve?
Hulumtuesi i Institutit Octopus e sheh thirrjen për serbët e zhvendosur si pranim praktik të realitetit juridik të Kosovës.
PRISHTINË — Gurakuç Kuçi, hulumtues i jashtëm i Institutit Octopus, ka vlerësuar se thirrja e Komisariatit për Refugjatë të Serbisë drejtuar serbëve të zhvendosur nga Kosova për të votuar më 7 qershor e rrëzon narrativën e Beogradit për "përndjekjen" e serbëve në Kosovë.
Përmes një postimi në Facebook, Kuçi ka shkruar: "Si është e mundur që logjika e propagandës serbe t'i ftojë 'të përndjekurit' serbë nga Kosova që të votojnë në Kosovë? A nuk frikësohet Serbia se këta refugjatë mund të rrezikohen në vendin ku pretendon se janë 'të përndjekur'?"
Sipas tij, autoritetet serbe po u kërkojnë këtyre qytetarëve të pajisen me dokumente të Republikës së Kosovës për të fituar të drejtën e votës, ndonëse Serbia vazhdon të mos e njohë shtetësinë e Kosovës. Kuçi e sheh këtë si "pranim praktik të realitetit juridik dhe institucional të Kosovës".
Hulumtuesi kërkon që institucionet e Kosovës dhe bashkësia ndërkombëtare të adresojnë "inxhinierinë elektorale" të Serbisë përmes Listës Serbe, që komuniteti serb të ushtrojë të drejtat politike pa presione të jashtme.
Burim: Telegrafi
— Redaksia ZHURMA