Qeveria vendos krijimin e Inspektoratit Qendror të Punës

TIRANË — Konfederata e Sindikatave të Shqipërisë (KSSH) ka deklaruar mbështetjen për vendimin e Këshillit të Ministrave për krijimin e Inspektoratit Qendror të Punës (IQP). Ky institucion i ri do të organizohet përmes një strukture qendrore dhe pesë drejtorive rajonale, duke synuar një mbikëqyrje më efektive të marrëdhënieve të punës në vend.

Ndonëse e konsideron këtë vendim si një hap të domosdoshëm dhe kërkesë të kahershme të lëvizjes sindikale, KSSH tërheq vëmendjen se procesi u miratua pa një konsultim të plotë me partnerët socialë. Megjithatë, organizata shprehet se ky organizim i ri do të jetë më funksional për mbrojtjen e punëtorëve.

Sindikalistët kërkojnë që kjo reformë të shoqërohet me ndryshime të legjislacionit të punës, në përputhje me standardet e Bashkimit Evropian dhe konventat e Organizatës Ndërkombëtare të Punës (ILO). Sipas tyre, është thelbësore të garantohet pavarësia funksionale e inspektimit, profesionalizmi i inspektorëve dhe zbatimi i barabartë i ligjit.

Në njoftimin e saj, KSSH theksoi se do të ndjekë nga afër ngritjen dhe funksionimin e Inspektoratit të ri. Organizata kërkon përfshirjen e partnerëve socialë në hartimin e akteve nënligjore dhe në monitorimin e zbatimit të kësaj reforme për të siguruar rezultate konkrete për punëmarrësit.

Burim: ATSH
— Redaksia ZHURMA