Pse u rikthye Krasniqi-Goodman në shtëpinë e dhunës?

PRISHTINË — E mbijetuara e dhunës seksuale gjatë luftës në Kosovë, Vasfije Krasniqi-Goodman, ka ndarë një rrëfim prekës në Facebook pas rikthimit në një nga vendet ku përjetoi krimin që, siç thotë ajo, ia ndryshoi jetën përgjithmonë.

Krasniqi-Goodman shkruan se është kthyer në shtëpinë ku, si një vajzë 16-vjeçare, përjetoi për herë të dytë tmerrin e dhunës seksuale nga forcat serbe. Shtëpia e parë ku ndodhi krimi nuk ekziston më, por kjo shtëpi ende qëndron.

"Doja të hyja në dhomën ku ndodhi krimi, në dhomën ku mbetën të varrosura britmat, frika dhe pafuqia e një vajze të re. Nuk munda. Në oborr ishte dikush duke punuar. Qëndrova jashtë dhe bëra vetëm një fotografi", ka shkruar ajo.

Ajo thekson se nuk është kthyer për të kërkuar mëshirë, por për të parë se vendi ende ekziston, ndërsa vazhdon të jetojë me pasojat. "Është një vend ku më morën pafajësinë, sigurinë dhe një pjesë të shpirtit tim", shprehet. "Dhe sot, më shumë se kurrë, zemra ime ndihet e thyer."

Burim: Zëri
— Redaksia ZHURMA