Krasniqi nënshkruan rregulloren për mbrojtjen e të dhënave personale në MAPL
Dokumenti përmbush një obligim ligjor dhe përcakton procedurat organizative e teknike për përpunimin e të dhënave personale të punonjësve në ministri.
PRISHTINË — Ministri i Administrimit të Pushtetit Lokal, Elbert Krasniqi, nënshkroi Rregulloren e Brendshme për Mbrojtjen e të Dhënave Personale, pas përfundimit të procesit të konsultimit publik. Rregullorja përmbush një obligim që buron nga legjislacioni në fuqi dhe përcakton procedurat organizative dhe teknike për përpunimin e të dhënave personale të punonjësve në Ministrinë e Administrimit të Pushtetit Lokal.
"Me nënshkrimin e këtij dokumenti, riafirmoj përkushtimin e MAPL-së për zbatimin e obligimeve ligjore, mbrojtjen e të dhënave personale, forcimin e sigurisë së informacionit, transparencën institucionale dhe respektimin e privatësisë së zyrtarëve dhe qytetarëve", deklaroi Krasniqi.
Rregullorja e plotë u publikua në ueb-faqen zyrtare të Ministrisë së Administrimit të Pushtetit Lokal. Dokumenti vendos kështu bazën zyrtare për trajtimin e të dhënave personale brenda institucionit, siç e kërkon legjislacioni në fuqi.
Burim: IndeksOnline
— Redaksia ZHURMA