Pse Qalaj i shkroi Presidentes në emër personal dhe jo institucional?
Anëtari joprokuror i KPK-së kritikon ushtruesin e detyrës së Kryeprokurorit për komunikim jashtë Këshillit në procesin e zgjedhjes.
PRISHTINË — Visar Krasniqi, anëtar joprokuror në Këshillin Prokurorial të Kosovës (KPK), ka kritikuar mënyrën e komunikimit të ushtruesit të detyrës së Kryeprokurorit të Shtetit, Besim Qalaj, me Presidencën në procesin e zgjedhjes së Kryeprokurorit të Shtetit.
Në emisionin “Tempus” në T7, Krasniqi tha se më 26 shkurt Qalaj i kishte dërguar letër u.d. Presidentes Albulena Haxhiu në emër të tij personal, jo të institucionit. “Ushtruesi i detyrës së Kryeprokurorit të Shtetit është anëtar ex officio në Këshill, një në mesin e të barabartëve, dhe rrjedhimisht nuk është dashur të bëjë kësisoj komunikimi”, tha ai.
Krasniqi shtoi se anëtarët e Këshillit nuk kishin qenë në dijeni për këtë letër në janar të këtij viti. Ai vlerësoi se pranimi i letrave nga Presidenca dhe Qalaj përfundon “pingpongun” mes Këshillit Prokurorial dhe Presidentes për një proces që zvarritet që nga viti 2022 dhe është kritikuar nga partnerët ndërkombëtarë dhe shoqëria civile.
Burim: Gazeta Express
— Redaksia ZHURMA