KQZ refuzon 755 pako postare, 699 pa dëftesë regjistrimi

PRISHTINË — Komisioni Qendror i Zgjedhjeve ka njoftuar se po vazhdojnë aktivitetet e numërimit dhe verifikimit të votave për zgjedhjet e parakohshme për Kuvendin e Kosovës, të mbajtura më 7 qershor. Sipas njoftimit të publikuar të enjten në orën 16:00, në Qendrat Komunale të Numërimit ka përfunduar verifikimi dhe numërimi në 35 qendra, ndërsa 91 për qind e vendvotimeve në nivel vendi janë procesuar. Ndërkohë, në Qendrën e Numërimit dhe Rezultateve ka nisur numërimi i fletëvotimeve nga votimi në përfaqësitë diplomatike të Republikës së Kosovës.

Më 6 qershor, votimi u zhvillua në 30 përfaqësi diplomatike të vendosura në 18 shtete të ndryshme. Nga 27 mijë e 724 shtetas të regjistruar për të votuar fizikisht në këto misione diplomatike, votuan 22 mijë e 860 qytetarë, ose 82.46 për qind. Të gjitha këto fletëvotime tashmë kanë hyrë në procesin e numërimit.

Paralelisht, në QNR po vazhdon edhe vlerësimi i pakove të supozuara me fletëvotime nga votimi me postë. Deri në fund të ditës së mërkurë, 10 qershor, janë shqyrtuar mbi 23 mijë e 300 pako, prej të cilave 22 mijë e 601 janë miratuar, ndërsa 755 janë refuzuar. KQZ bën të ditur se arsyeja kryesore e refuzimit ka qenë mungesa e dëftesës së regjistrimit, dokument që përmban të dhëna unike të votuesit. Nga gjithsej rastet e refuzuara, 699 kanë rezultuar pa këtë dokument.

Procesi i verifikimit të pakove postare ka nisur më 9 qershor dhe synon të konfirmojë nëse ato janë dërguar nga votues të regjistruar për votim me postë. Pas përfundimit të këtij procesi, KQZ do të publikojë numrin përfundimtar të pakove që do t'i nënshtrohen numërimit.

Sipas të dhënave të KQZ-së, nga 23 kuti postare në 22 shtete dhe në Kosovë janë tërhequr mbi 85 mijë e 700 pako të supozuara me fletëvotime. Ndërkaq, për votimin me postë në këto zgjedhje janë regjistruar gjithsej 104 mijë e 480 votues.

Burim: Demokracia
— Redaksia ZHURMA