KQZ mbyll pa vendim verifikimin e 20 kandidatëve me precedentë

Komisioni Qendror i Zgjedhjeve ka mbyllur pa një vendim përfundimtar procedurën e verifikimit të integritetit për Kreshnik Gjon Gjonajn, kandidat i Partisë Socialdemokrate në Lezhë për zgjedhjet e 11 majit 2025. Vendimi erdhi pasi kandidati nuk fitoi mandat deputeti, duke e çuar në 20 numrin e kandidatëve që u është mbyllur verifikimi pa vendim përfundimtar gjatë periudhës 2021-2025.

Ligji për garantimin e integritetit të personave që ushtrojnë funksione publike u miratua më 17 dhjetor 2015, pas një fushate dyvjeçare të opozitës me synim vetëdeklarimin e së kaluarës penale dhe ndalimin e hyrjes në politikë të personave me precedentë të rëndë. Megjithatë, monitorimi i Institutit të Studimeve Politike për periudhën prill–korrik 2026, përmes shqyrtimit të 13 vendimeve të KQZ-së për këshillat bashkiakë, tregon se mekanizmi vuan nga kufizime ligjore kur subjektet nuk marrin mandat.

Në formularin e vetëdeklarimit, Kreshnik Gjon Gjonaj kishte shënuar se ishte hetuar ose gjykuar në Itali për një konflikt të çastit dhe se kishte marrë pafajësi. Por verifikimi i thelluar i kryer nga Prokuroria e Përgjithshme zbuloi se ai kishte një dënim të formës së prerë nga drejtësia italiane për transferim të paligjshëm të lëndës narkotike. Sipas Prokurorisë së Përgjithshme, dënimi përmbante një vit burgim dhe 2,600 euro gjobë, i pezulluar me kusht. Megjithëse kandidoi në kushtet e ndalimit ligjor dhe mori 359 vota preferenciale në listën e PSD-së, procedurat u mbyllën pasi Komisioneri Shtetëror i Zgjedhjeve argumentoi se çështja kishte humbur objektin. Komisioneri Shtetëror i Zgjedhjeve, Ilirian Celibashi, njoftoi se 90% e rasteve të verifikimit të thelluar kryhen tej afatit ligjor 60-ditor. Sipas KQZ-së, përgjegjësia për vonesat u ngarkohet disa institucioneve si Prokuroria e Përgjithshme, Gjendja Civile, Burgjet dhe autoritetet e huaja ligjore.

Mbyllja e verifikimeve pa një vendim përfundimtar lë të hapur mundësinë që personat me precedentë penalë të garojnë sërish në të ardhmen. Pasi procedura mbyllet pa vendim, gjetjet e verifikimit të mëparshëm humbasin vlerën juridike dhe nuk mund të shërbejnë si pengesë ligjore automatike për kandidimet e ardhshme.

Lidhur me procedurat e tejzgjatura, Ilirian Celibashi deklaroi: «90% e rasteve të verifikimit të thelluar janë verifikuar jashtë afatit 60 ditor». Ai sqaroi më tej se arsyet e kësaj tejzgjatjeje nuk mund t’i atribuohen vetëm institucionit që ai drejton.