Rama fton sërish protestuesit për dialog në ditën e pestë me sofrën e gurtë

Kryeministri Edi Rama ka përsëritur të shtunën ftesën për dialog ndaj protestuesve, duke vendosur sërish sofrën e gurtë me letrat me mbishkrimin dialog përpara godinës së Kryeministrisë. Kjo është dita e pestë radhazi që kreu i qeverisë kërkon bisedime, ndërsa studentët dhe qytetarët kanë refuzuar të ulen në tryezë, duke kërkuar dorëheqjen e tij gjatë ditës së 19-të të protestave.

Lëvizja e qytetarëve dhe studentëve nisi me kërkesa që lidheshin me arsimin dhe kushtet e studentëve, por më pas u zgjerua me pjesëmarrjen e qytetarëve dhe me kërkesa për qeverisjen. Kryeministri ka përjashtuar mundësinë e dorëheqjes, me arsyetimin se qeveria ka marrë mandat përmes zgjedhjeve. Gjatë ditëve të fundit, intensiteti i tubimeve dhe pjesëmarrja e qytetarëve në protestë ka rënë ndjeshëm, ku në bulevard ka pasur vetëm një grup të vogël njerëzish.

Gjatë mëngjesit të së shtunës, kryeministri Edi Rama ka shpërndarë në llogarinë e tij në rrjetin social Facebook një video ku shihet sofra e gurtë, e njohur edhe si tavolina prej mermeri, e vendosur përpara godinës së Kryeministrisë. Mbi këtë tryezë janë vendosur disa letra me mbishkrimin dialog, ndërsa krah pamjeve të postuara kreu i qeverisë ka shkruar fjalën «Mirëmëngjes». Shefi i ekzekutivit e ka ndarë dhunën e ushtruar në protesta, për të cilën shprehet se është nën ndikimin e forcave të huaja, nga pjesa e studentëve apo qytetarëve që mund të kenë shqetësime konkrete që duhen dëgjuar nga autoritetet.

Për të frenuar aktet e dhunshme gjatë tubimeve, qeveria ka paraqitur një paketë ligjore që ka si synim ashpërsimin e masave, gjobave dhe dënimeve për protestuesit e dhunshëm, si dhe për personat që i mbështesin ata. Nga ana tjetër, protestuesit kanë refuzuar në vazhdimësi këtë format komunikimi me ekzekutivin dhe kanë këmbëngulur se rruga e vetme për zgjidhjen e situatës mbetet largimi i kryeministrit nga detyra.

Për ditën e shtunë janë njoftuar dy protesta të ndryshme në kryeqytet. Në orën 12:00 është paralajmëruar zhvillimi i protestës kombëtare të njoftuar nga Partia Demokratike. Gjithashtu, studentët kanë njoftuar një protestë kombëtare duke caktuar grumbullimin në orën 12:00 përpara Ministrisë së Arsimit, për të vijuar më pas marshimin e tyre në orën 14:00 përpara godinës së Kryeministrisë. Lidhur me këto zhvillime, Ambasada Amerikane u ka bërë thirrje qytetarëve për kujdes gjatë protestës së të shtunës.