Familja e Bruce Willis vendos të dhurojë trurin e aktorit për studime shkencore

Familja e aktorit 71-vjeçar Bruce Willis ka marrë vendimin për të dhuruar trurin e tij pas vdekjes për kërkime shkencore rreth demencës frontotemporale. Lajmi është bërë me dije nga bashkëshortja e tij, Emma Heming Willis, ndërsa synimi i këtij akti është avancimi i studimeve mbi sëmundjen neurodegjenerative me të cilën po përballet ylli i filmit.

Aktori u diagnostikua me demencë frontotemporale në vitin 2023, pasi më parë në vitin 2022 u njoftua se ai vuante nga afazia, një çrregullim që godet aftësitë e komunikimit. Gjendja e tij u ndërlikua më tej në janar, kur Heming zbuloi se Willis është prekur edhe nga anosognosia, një çrregullim neurologjik që pengon pacientin të kuptojë sëmundjen e vet. Kjo sëmundje përparon me kalimin e kohës dhe aktualisht nuk ka ndonjë kurë efikase që mund ta ndalojë atë.

Vendimi për dhurimin e trurit u mor pasi Heming u këshillua me ish-bashkëshorten e aktorit, Demi Moore, si dhe me vajzat Rumer, Scout dhe Tallulah. Detajet rreth kësaj zgjedhjeje u përshkruan prej saj në librin "The Unexpected Journey" (Një udhëtim i papritur), si dhe në një rrëfim të botuar nga revista italiane "Vanity Fair" më 29 tetor. Po ashtu, vajza e tij Tallulah Willis ka ndarë së fundmi një fotografi ku shihet duke përqafuar e puthur në kokë të atin, i cili i përgjigjet me një buzëqeshje.

Përmes këtij hapi, studiuesit do të kenë mundësi të analizojnë mostrat e trurit për të parë ndryshimet e shkaktuara dhe zhvillimin e sëmundjes, me shpresë për të gjetur trajtime më efektive. Familja ka folur hapur për vështirësitë e përditshme me qëllim rritjen e ndërgjegjësimit dhe ndihmën ndaj personave të tjerë që përballen me këtë diagnozë.

Emma Heming e ka përshkruar këtë vendim si «emocionalisht shkatërrues, por shkencërisht të nevojshëm». Ajo ka shtuar se bashkëshorti i saj ka pasur gjithmonë dëshirë t'u vijë në ndihmë të tjerëve, ndaj kjo zgjedhje nderon karakterin e tij.