KPK cakton udhëheqësit e rinj të departamenteve në Prokurorinë Speciale

Këshilli Prokurorial i Kosovës ka marrë vendim për caktimin e udhëheqësve të përkohshëm të tri departamenteve të Prokurorisë Speciale të Republikës së Kosovës, pas propozimit të ushtruesit të detyrës së kryeprokurorit të kësaj prokurorie, Dren Paca. Sipas vendimit të miratuar, Departamenti për Krime të Organizuar do të udhëhiqet nga Kastriot Mema, Departamenti për Korrupsion i është besuar Rafet Halimit, kurse në krye të Departamentit për Terrorizëm është caktuar Bekim Kodraliu.

Gjatë diskutimeve para votimit të këtij vendimi, anëtari i KPK-së, Milot Krasniqi, ka shprehur kundërshtimin e tij lidhur me caktimin e Kastriot Memës në krye të Departamentit për Krime të Organizuar. Krasniqi ka përmendur kriterin se prokurori duhet të ketë së paku dy vjet përvojë pune në atë departament. Nga ana tjetër, kryesuesi i Këshillit ka sqaruar se këto janë emërime të përkohshme dhe do të mbeten në fuqi deri në një vendim të ri.