Pse renditet Kosova e dyta më e varfra në Evropë sipas FMN-së?

PRISHTINË — Kosova u rendit si vendi i dytë më i varfër në Evropë nga platforma World Atlas, sipas të dhënave të Fondit Monetar Ndërkombëtar. Vendi nuk ka arritur ritmin e zhvillimit të nevojshëm për përmirësimin e standardit jetësor, prandaj vazhdon të konsiderohet “një ekonomi e vogël dhe e varfër”, thotë Blendi Hasaj, drejtor ekzekutiv i Institutit GAP.

“Ne jemi diku tek 30% e mesatares së Bashkimit Evropian, sa i përket Bruto Produktit Vendor për kokë banori”, shprehet Hasaj në podkastin “5 pyetje” të Radios Evropa e Lirë. Ai thekson se matjet makroekonomike nuk e pasqyrojnë gjithmonë realitetin social, pasi brenda mesatareve ekzistojnë pabarazi të mëdha. “Mjafton që disa persona të kenë paga shumë të larta, dhe mesatarja krijon përshtypjen se situata është më e mirë sesa është realisht.”

Hasaj kritikon programin e Qeverisë në detyrë për ndarjen e 100 eurove për kategori të ndryshme, duke i quajtur “zgjidhje ad hoc” që shpërndahen në kohë zgjedhjesh. Ai vë në dukje se inflacioni dhe çmimet e larta të produkteve bazike kanë rënduar veçanërisht familjet me të ardhura të ulëta dhe punëtorët e sektorit privat, ku paga mbizotëruese është afër nivelit të pagës minimale.

Varësia nga diaspora mbetet një tjetër karakteristikë e modelit ekonomik. Vetëm remitancat arrijnë mbi 1.35 miliard euro, shumica e të cilave shkojnë në konsum. Sipas Hasajt, papunësia dhe mosaktivizimi i grave — Kosova ka shkallën më të lartë të grave joaktive në Evropë — janë probleme strukturore që kërkojnë reforma dhe investime në çerdhe e kujdes për të moshuarit për të ulur varfërinë.

Burim: Zëri
— Redaksia ZHURMA