Kosova rrezikon humbjen e eksportit të peshkut në Mal të Zi

Kosova rrezikon ta humbë mundësinë e eksportit të produkteve të peshkut drejt Malit të Zi nga 1 korriku 2027, për shkak të mosplotësimit të standardeve të kërkuara nga Bashkimi Evropian dhe problemeve të përsëritura me sigurinë ushqimore. Shqetësimi lidhur me këtë çështje është ngritur nga Dhoma e Tregtisë dhe Industrisë së Kosovës.

Vendet e rajonit janë duke përafruar legjislacionin e tyre me atë të Bashkimit Evropian, ndërsa Mali i Zi pritet të zbatojë kërkesa të reja për importin e produkteve të peshkut. Drejtori ekzekutiv i Dhomës së Tregtisë, Kushtrim Ahmeti, ka thënë se një situatë e tillë mund të ndodhë edhe me Shqipërinë. Sipas Ahmetit, Ministria e Bujqësisë e Malit të Zi ka konfirmuar se vendimi që pamundëson importin e peshkut nga Kosova hyn në fuqi nga qershori i vitit të ardhshëm. Ai ka shtuar se e njëjta gjë do të ndodhë edhe me Shqipërinë sapo të ratifikohen ndryshimet ligjore për harmonizim me legjislacionin evropian, duke prekur eksportin e produkteve të freskëta, të ftohta dhe të ngrira.

Profesori i bujqësisë, Salih Salihu, ka vlerësuar se institucionet e vendit duhet të punojnë më shumë drejt harmonizimit të standardeve. Sipas Salihut, Kosova eksporton shumë pak produkte bujqësore dhe importon rreth 800 milionë euro produkte, ndërsa prodhimi vendor arrin vlerën rreth 400 milionë eurove. Sipas rregullave të Bashkimit Evropian, eksporti i peshkimit lejohet vetëm nëse shteti eksportues është i autorizuar, objektet e përpunimit e ruajtjes janë të miratuara dhe çdo dërgesë shoqërohet me certifikatë zyrtare shëndetësore. Lidhur me këtë situatë, pyetje janë dërguar në Agjencinë e Ushqimit dhe Veterinarisë, por nuk është kthyer ndonjë përgjigje.