Kosova lidh marrëveshje 41 milionë euro për shëndetësinë
Qeveria e Kosovës ka siguruar mbështetje financiare nga institucionet evropiane për pajisje mjekësore dhe përmirësimin e spitaleve.
Redaksia ZHURMA · · 1 min lexim
Republika e Kosovës ka zyrtarizuar një marrëveshje kredie me vlerë totale prej 41 milionë eurosh, e cila synon përmirësimin e infrastrukturës shëndetësore dhe sigurimin e aparaturave moderne mjekësore. Nismën e mbështesin përmes bashkëfinancimit të barabartë Banka Evropiane e Investimeve dhe Banka për Zhvillim e Këshillit të Evropës.
Ministri i Financave, Hekuran Murati, ka deklaruar: «Vlera e përgjithshme e këtij projekti është 41 milionë euro, dhe bashkëfinancimi është i ndarë barabartë nga dy bankat, pra EIB dhe CEB. Investimi do të sigurojë pajisje mjekësore moderne dhe do të ndikojë në infrastrukturën e pacientëve në Qendrën Klinike Universitare të Kosovës në Prishtinë, si dhe në spitalet rajonale të Prizrenit, Pejës, Gjakovës dhe atë të Gjilanit».
Nga ana e tij, ministri i Shëndetësisë, Arben Vitia, ka bërë të ditur se ky investim përkon me prioritetet e përcaktuara në Strategjinë Sektoriale të Shëndetësisë për periudhën 2025–2030, e cila parasheh riorganizimin e institucioneve të kujdesit shëndetësor dhe ngritjen e teknologjisë mjekësore.
