Çfarë po rrezikon Kosova duke injoruar gazin amerikan?

PRISHTINË — Oda Ekonomike Amerikane në Kosovë (OEAK), Oda Ekonomike e Kosovës (OEK) dhe Aleanca Kosovare e Bizneseve (AKB) kanë reaguar me shqetësim ndaj heshtjes së Qeverisë në detyrë për gazin amerikan, duke paralajmëruar se kjo rrezikon partneritetin strategjik me Shtetet e Bashkuara.

OEAK deklaroi më 17 qershor se "shpërfillja e vazhdueshme e qëndrimeve dhe prioriteteve strategjike të aleatit më të afërt të Kosovës bart rrezikun e ndikimit në cilësinë dhe thellësinë e këtij partneriteti me kalimin e kohës".

Kryetari i OEK-ut, Lulzim Rafuna, tha se vetëm Kosova ka mbetur jashtë gazit amerikan. Ai vuri në dukje se të njëjtën ditë që Shqipëria nënshkroi marrëveshjen me Greqinë për gazin amerikan, Kroacia dhe Bosnja e nënshkruan po të njëjtën marrëveshje me mbështetjen e SHBA-së.

"Këto marrëveshje shkojnë përtej gazit; kjo e ka të mirën ekonomike, ndikon në zhvillimin ekonomik, ndikon që të jesh i pavarur nga gazi rus", tha Rafuna për EO.

Kryetari i AKB-së, Agim Shahini, deklaroi se "kundërshtimi i projekteve amerikane, përfshirë projektin e gazit amerikan, është kundërshtim i zhvillimit të Kosovës". Ish-kryetari i OEK-ut, Safet Gërxhaliu, shtoi se "ai që kundërshton dhe mendon se Amerika ka tendencë negative për të na dëmtuar, e ka jo vetëm gabim, por është një gabim që nuk falet".

Këto reagime erdhën pasi e ngarkuara me punë në Ambasadën amerikane, Anu Prattipati, i bëri thirrje Kosovës të hyjë në partneritet afatgjatë energjetik, duke paralajmëruar se "mundësia për t'iu bashkuar këtyre projekteve po mbyllet". U.D. e presidentës, Albulena Haxhiu, u përgjigj shkurt: "Nuk e kam parë fare, më vjen keq, nuk e kam parë".

Kryeministri në detyrë nuk ka dhënë përgjigje zyrtare. Heshtja e pushtetit vjen në kohën kur rajoni po lidhet me rrjetin e gazit të lëngshëm natyror, ndërsa Kosova rrezikon mbetja e vetme pa alternativë ndaj gazit rus.

Burim: Demokracia
— Redaksia ZHURMA