Kosova importon rreth 3 miliardë euro mallra në pesë muaj

PRISHTINË — Në pesë muajt e parë të vitit 2026, Kosova ka importuar mallra në vlerë prej afro 3 miliardë eurosh. Kjo shifër shënon një rritje prej rreth 162 milionë eurosh në krahasim me të njëjtën periudhë të vitit të kaluar, sipas të dhënave zyrtare të Doganës dhe Agjencisë së Statistikave të Kosovës.

Tregu kosovar vazhdon të dominohet kryesisht nga Gjermania, Kina dhe Turqia. Prej këtyre tri shteteve, Kosova ka importuar mallra në vlerë prej 1 miliard e 131 milionë eurosh, që përbën rreth 38 për qind të vlerës së të gjitha importeve të realizuara në vend gjatë kësaj periudhe pesëmujore.

Gjatë muajit maj, importet kapën vlerën prej 635 milionë eurosh, një rritje prej mbi 5 për qind krahasuar me majin e vitit 2025. Sipas ASK-së, grupet kryesore të mallrave të importuara përfshijnë makineritë dhe pajisjet elektrike, produktet minerale, ushqimet e përgatitura, pijet, duhanin, mjetet e transportit dhe metalet bazë.

Në anën tjetër, eksporti i produkteve vendore me mbishkrimin "Made In Kosova" arriti në 419 milionë euro, duke shënuar një rritje prej 16 për qind krahasuar me vitin e kaluar. Megjithatë, vetëm në muajin maj u eksportuan 94 milionë euro mallra, duke shënuar një rënie prej 4 milionë eurosh krahasuar me prillin.

Sipas ASK-së, eksportet kryesore të vendit përbëheshin nga metalet bazë, plastika, goma, si dhe ushqimet e përgatitura, pijet e duhani. Deficiti tregtar mbetet i lartë, duke shfaqur varësinë e Kosovës, e cila më 2025 importoi 7 miliardë euro mallra dhe eksportoi nën 1 miliard.

Për të zbutur këtë deficit, një raport i fundit nga Ministria e Industrisë, Ndërmarrësisë dhe Tregtisë ka identifikuar tri grupe produktesh për zgjerimin e eksporteve. Raporti thekson se produktet e avancuara ndërtimore, produktet e përpunuara bujqësore dhe ato me bazë druri janë kategoritë më konkurruese.

Ndër to, produktet prej druri dhe mobiliet udhëheqin në tregjet e Zvicrës, Gjermanisë dhe vendeve të CEFTA-s, falë qasjes pa tarifa. Pa mbështetjen e shtetit që firmat vendore të përmbushin standardet ndërkombëtare, deficiti tregtar do të vazhdojë të mbajë peng ekonominë e vendit.

Burim: Koha.net
— Redaksia ZHURMA