Ku renditet Kosova sipas varfërisë në Evropë?

PRISHTINË — Kosova renditet si shteti i dytë më i varfër në Evropë, menjëherë pas Moldavisë, sipas një raporti të publikuar nga WorldAtlas dhe bazuar në të dhënat e Fondit Monetar Ndërkombëtar (IMF WEO 2025) për GDP-në për kokë banori sipas fuqisë blerëse (PPP).

Sipas raportit, ekonomia e Kosovës është e vogël dhe e orientuar nga shërbimet, ku ndërtimtaria, tregtia me pakicë dhe remitancat përbëjnë pjesën më të madhe të aktivitetit ekonomik. Remitencat nga diaspora kosovare — e përqendruar në Gjermani, Zvicër dhe Austri — arrijnë rregullisht në rreth 15% të GDP-së, një nga raportet më të larta në botë.

Rritja reale e GDP-së ka qenë mesatarisht rreth 4% gjatë pesë viteve të fundit, por papunësia e të rinjve është afër 30% dhe një e treta e të rinjve kosovarë nuk janë as në punë, as në arsim apo trajnim. Raporti përmend gjithashtu "njohjen e kufizuar ndërkombëtare" të vendit, që "kufizon qasjen në institucionet ndërkombëtare dhe ngadalëson investimet e huaja".

Sipas të dhënave të raportit, Moldavia mbetet shteti më i varfër në Evropë me GDP për kokë banori sipas PPP-së prej rreth 19,700 dollarësh. Pas Kosovës me 20,400 dollarë renditen Ukraina (21,000), Bosnjë e Hercegovina (22,800), Maqedonia e Veriut (24,300), Bjellorusia (25,500), Shqipëria (25,600), Serbia (28,500), Mali i Zi (31,000) dhe Bullgaria (36,000).

Burim: RTV21
— Redaksia ZHURMA