Kosova dhe Portugalia shqyrtojnë lidhjen e drejtpërdrejtë ajrore

Ministrja Mimoza Kusari ka zhvilluar një vizitë zyrtare në Portugali, ku u takua në Parlamentin portugez me kryetarin e Grupit të Miqësisë Portugali–Kosovë, Bruno Vitorino, si dhe me deputetët Edite Estrela, Jose Dotti e Miguel Costa Matos. Gjatë këtij takimi u trajtua forcimi i marrëdhënieve politike, ekonomike dhe institucionale, ndërsa u theksua mbështetja portugeze për integrimin evropian të Kosovës dhe anëtarësimin në organizata ndërkombëtare, përfshirë Këshillin e Evropës. Sipas Kusarit, palët diskutuan edhe mundësinë e organizimit të një Forumi të Biznesit Kosovë–Portugali në Prishtinë vitin e ardhshëm dhe nënshkrimin e një marrëveshjeje bilaterale për bashkëpunim ekonomik.

Ministrja e Tregtisë dhe Industrisë, Mimoza Kusari-Lila, ka zhvilluar gjithashtu takime të ndara online me Sekretarin e Shtetit për Ekonominë e Portugalisë, João Rui Ferreira, dhe drejtuesen e Agjencisë Portugeze për Tregti dhe Investime, Ana Casaca, për shkak të një stuhie në Lisbonë. Në këto biseda u shqyrtua vendosja e një linje të drejtpërdrejtë ajrore mes dy vendeve, e cila do të lehtësonte lidhjet dhe do të ndihmonte zhvillimin e turizmit. «Diskutuam gjithashtu mundësinë e një marrëveshje bilaterale ekonomike, organizimin e një Forumi të Biznesit Kosovë–Portugali në Prishtinë ashtu edhe krijimin e një linje të drejtpërdrejtë ajrore ndërmjet Kosovës dhe Portugalisë, që do të lehtësonte lidhjet mes dy vendeve», ka theksuar ajo. Po ashtu, në fokus ishte zgjerimi i bashkëpunimit në industrinë e mbrojtjes, teknologjinë e informacionit, zhvillim industrial dhe promovim të eksporteve. Takimet do të vazhdojnë gjatë punimeve të Web Summit për të thelluar partneritetin dypalësh.