Pse komuniteti turk kundërshton ligjin për përfaqësim të drejtë?

SHKUP — Partitë politike turke dhe organizatat e shoqërisë civile në Maqedoninë e Veriut dolën njëzëri kundër Propozim-ligjit për Përfaqësim të Drejtë dhe Adekuat, që po shqyrtohet në Kuvend. Sipas tyre, në formën aktuale ligji përmban mangësi dhe rrezikon të drejtat e komuniteteve më të vogla etnike, veçanërisht atij turk.

Reaguan Lidhja e Organizatave Joqeveritare Turke në Maqedoni (MATÜSİTEB) — që përfaqëson 72 shoqata anëtare — Partia Demokratike Turke (TDP), deputeti turk i koalicionit Fronti Europian, Salih Murat, dhe Lëvizja e Bashkimit Kombëtar Turk (TMBH). Të gjithë kërkuan ndryshimin e projektligjit me mekanizma të qartë e të zbatueshëm.

MATÜSİTEB vlerëson se koncepti i përfaqësimit të drejtë e adekuat mbetet i papërcaktuar qartë dhe nuk parashikon instrumente konkrete për korrigjimin e nën-përfaqësimit të komunitetit turk në institucionet shtetërore dhe lokale. Organizata theksoi se mbetet e përkushtuar ndaj dialogut konstruktiv dhe forcimit të barazisë në shoqëri.

Nga TDP thanë se ligji, në versionin aktual, nuk ofron garanci të mjaftueshme juridike dhe institucionale për zbatimin e plotë të një prej arritjeve më të rëndësishme të Marrëveshjes Kornizë të Ohrit. Partia u shpreh e gatshme të kontribuojë me propozime, por nuk mbështet zgjidhje që lë hapësirë për interpretime të ndryshme.

Deputeti Salih Murat deklaroi se Fronti Europian ka dorëzuar amendamente dhe ka ngritur shqetësimet edhe para Komisionit të Venecias e përfaqësuesve të BE-së. Sipas tij, miratimi në formën aktuale do të ishte në kundërshtim me Kushtetutën, Marrëveshjen Kornizë të Ohrit dhe praktikat ekzistuese juridike.

“Ky ligj është në kundërshtim të hapur me Kushtetutën, me Marrëveshjen Kornizë të Ohrit… Nëse miratohet në formën aktuale, do t’i jepet një goditje serioze integrimit të komuniteteve në nivel kushtetues”, tha Murat. TMBH paralajmëroi se mungesa e mekanizmave mbikëqyrës krijon terren për keqpërdorime.

Sipas TMBH-së, mungesa e verifikimit të deklarimit të përkatësisë etnike mund ta vështirësojë punësimin e pjesëtarëve turq në administratën publike. Partitë dhe organizatat u bënë thirrje deputetëve ta rishqyrtojnë projektligjin përmes dialogut, për një zgjidhje që forcon besimin dhe bashkëjetesën ndëretnike në vend.

Burim: Almakos
— Redaksia ZHURMA