Komunat e LVV-së bojkotuan protestën, por sfidat financiare mbeten

Tensioni ndërmjet qeverisjes qendrore dhe asaj lokale në Kosovë ka sjellë protesta para ndërtesës së Qeverisë, ku udhëheqës të ndryshëm vendorë kanë ngritur akuza ndaj ekzekutivit për shkak të kufizimit të kompetencave dhe vështirësive buxhetore. Kryetarët e komunave ku udhëheqin partitë opozitare, si Partia Demokratike e Kosovës, Lidhja Demokratike e Kosovës dhe Aleanca, pretendojnë se buxhetet për projekte po vonohen dhe bllokohen, duke lënë komunat me barrë të rënda financiare.

Sipas Bekim Saluhut, analist i politikave nga Instituti GAP, komunat përballen me rrezikun e një falimentimi funksional. Ai thekson se shumica e vështirësisë buxhetore nuk ka nisur gjatë udhëheqjes së Albin Kurtit, por është trashëguar, ndonëse Qeveria mbahet përgjegjëse për shkak të mungesës së adresimit të problemeve dhe neglizhimit të nevojave komunale. Një nga peshat kryesore mbeten obligimet nga kontratat kolektive të lidhura nga niveli qendror.