Kush kërkon shtyrjen e afatit?

— Komisioni i Posaçëm për Realizimin e Reformës Zgjedhore ka kërkuar shtyrjen e afatit të funksionimit deri më 30 nëntor 2026. Kërkesa, e nënshkruar nga dy bashkëkryetarët e komisionit, Damian Gjiknuri dhe Oerd Bylykbashi, i është dorëzuar kryetarit të Kuvendit, Niko Peleshi, si dhe Konferencës së Kryetarëve, e cila pritet ta shqyrtojë në mbledhjen e saj të radhës.

Sipas Telegrafit, kërkesa argumenton se zgjatja e afatit është e nevojshme për t’u dhënë forcave politike më shumë kohë për të arritur dakordësi mbi çështjet kryesore të reformës, përpara se të nisë puna teknike për hartimin e ndryshimeve në Kodin Zgjedhor. Një tjetër element që ka ndikuar në zgjatjen e afateve është edhe marrja së fundmi e vlerësimit të Komisionit të Venecias, i cili pritet të shërbejë si referencë në hartimin e ndryshimeve ligjore.

Koha raporton se Komisioni do të vijojë punën deri në fund të muajit nëntor, afat brenda të cilit pritet të finalizohen diskutimet politike dhe propozimet për ndryshimet në Kodin Zgjedhor. Sipas kërkesës së dorëzuar kryetarit të Kuvendit Niko Peleshi, procesi i reformës ka rezultuar më kompleks nga sa ishte parashikuar fillimisht, për shkak të numrit të madh të rekomandimeve dhe opinioneve që duhet të shqyrtohen.

Burim: Report Tv, https://report.al/reforma-zgjedhore-komisioni-kerkon-shtyrjen-e-afatit-te-punes-deri-me-30-nentor/
— Redaksia ZHURMA