Kine: Burri futet me ekskavator në kompleksin qeveritar dhe shkatërron ndërtesat

Një ngjarje e pazakontë ka tronditur një kompleks zyrash qeveritare në Kinë, pasi një person ka hyrë me mjet të rëndë duke shkaktuar dëme të mëdha materiale gjatë një aksioni që zgjati për afro një orë. Pamjet e shpërndara në rrjetet sociale shfaqnin ekskavatorin duke goditur hyrjet, dyert prej xhami dhe fasadat e ndërtesave, ndërsa qytetarët dhe punonjësit u larguan me urgjencë nga kompleksi.

Sipas të dhënave zyrtare dhe raportimeve të mediave, incidenti preku të paktën gjashtë pjesë të kompleksit, ku u dëmtuan shkallët dhe tabela kryesore e Ndërtesës 1, si dhe objektet e tjera përreth. Një punonjës i qendrës deklaroi se situata solli panik të madh te të pranishmit. «Ishim shumë të frikësuar. Askush nuk guxoi ta ndalonte», u shpreh ai, ndërsa dëshmitarët shtuan se rreth 20 efektivë të forcave speciale të policisë ndërhynë për të neutralizuar autorin pas ndalimit të mjetit.

Autoritetet vendase kanë nisur hetimet për të zbardhur rrethanat dhe motivet e sakta të ngjarjes, ndërkohë që funksionimi i qendrës qeveritare u pezullua përkohësisht. Një pistë e mundshme e shqyrtuar nga Al Jazeera lidhet me një mosmarrëveshje rreth kompensimeve financiare ndaj banorëve të fshatrave përreth, por ky informacion mbetet ende pa konfirmim zyrtar. Deri në raportimet e fundit nuk raportohet për persona të lënduar.