Këshilli i Sigurimit i OKB-së mblidhet për raportin e UNMIK-ut

Këshilli i Sigurimit i Organizatës së Kombeve të Bashkuara do të mblidhet për të shqyrtuar raportin gjashtëmujor të Misionit të OKB-së në Kosovë, i cili përfshin periudhën nga 16 marsi deri më 15 shtator të këtij viti. Mbledhja e mëparshme ku u shqyrtua raporti për vendin ishte mbajtur më 9 prill.

Sipas dokumentit, situata e përgjithshme e sigurisë ka mbetur stabile, por vërehet se bllokada institucionale ka vazhduar dhe përparimi në zbatimin e Marrëveshjes së Brukselit ka qenë i kufizuar. Raporti përfshin gjithashtu zhvillimet në fushën e drejtësisë, ku përmenden arrestimi i disa personave serbë të dyshuar për krime lufte dhe dënimi i tre personave për sulmin në Banjskë.

Në dokument trajtohen edhe mbyllja e institucioneve paralele serbe që funksiononin ilegalisht, njoftimi i KFOR-it për tërheqjen graduale të pranisë së përhershme nga ura mbi lumin Ibër, si dhe angazhimi i Policisë së Kosovës pranë Manastirit të Deçanit.